Tō mātou poari

Pēnei i ngā kura kei reira ā-tinana ngā ākonga kua whai Poari Kaitiaki mātou e takohanga ana ki te whakarite kia kāwanatia, kia whakahaeretia te kura e ai ki ngā ture hāngai me ngā Aratohu Mātauranga ā-Motu. Heoi anō, ko te mea rerekē ka whakatūria tō mātou Poari e te Minita o te Mātauranga.

Anei ō mātou mema poari:

Karen Sewell (Chair)
Maxine Moana-Tuwhangai
Stuart Middleton
John Chemis
Ruma Karaitiana
Mele Wendt

Karen Sewell

Ko Karen te Tumu Whakarae Tōmua o Te Tāhuhu o Te Mātauranga me te Hekeretari mō te Mātauranga. I mahi hoki hei Tumu Whakarae me Te Kaiarotake Matua o Te Tari Arotake Mātauranga, ā, ko ia hoki te Tumu Whakarae Whakakapi mō te Mana Tohu Mātauranga. I whakaako a Karen i ngā kura i Te Hononga o Ingarangi, i Aotearoa hoki, tae atu ki Te Kāreti o Onslow i Te Whanganui-a-Tara, me te Kura Teitei o Green Bay, i mahi ai hei Tumuaki. Kua whakahiwhia ia ki te tūnga o te pūkenga whakaako i Te Whare Wānanga o Te Ūpoko o Te Ika a Māui, ki te Takuhe Nuffield i Te Whare Wānanga o Rānana, ā, i mahi hoki hei Kaitirotiro o ngā Kura Tuarua i Aotearoa. E kaha ū ana a Karen ki te whakapai ake i ngā putanga mātauranga mō ngā ākonga Māori me te Pasifika. I te tau 2016 i whakawhiwhia ki Te Kahurangi Karen Sewell, QSO, te tohu kahurangi i ngā Hōnore Rā Whānau o te Kuini mō ana ratonga ki te mātauranga.

Maxine Moana-Tuwhangai

He Kaikaute Whaitohu a Maxine me te kapapori i roto i ngā rāngai miraka kau, whakawhitinga waea, hauora, ture, mātauranga me te kāwanatanga ā-rohe. Ko ia te heamana o te Komiti Whakatūturu Mōrea o Te Kura. He Kaikomihana Taiao whaitohu a Maxine, ā, kua mahi hei mema o ētahi rōpū e rongo ana i ngā tono whakaaetanga rawa. I tēnei wā ko ia te Heamana o te mana iwi o Tainui ki Waikato, Te Whakakitenga o Waikato, te Heamana mō te Poari Rīki Aotearoa mō te Rohe o Waenga ki te Raki, te Heamana o te Komiti Pupuru o Waikato ki Waenga mō te Kaunihera ā-Rohe o Waikato me te Kaitiaki mō te Tarahiti Tohu Hillary Duke of Edinburgh. I ngā tau o mua he mema a Maxine o ngā poari o Te Kuratini o Waikato, ko ia te Heamana o te Poraka Taharoa C Manatōpū, ā, he mema o mua o Nō te Rere Moana Aotearoa.

Stuart Middleton

Ko Stuart te Kaiwhakahaere o ngā Hononga ā-Waho i Te Whare Takiura o Manukau, ā, kei a ia te takohanga mō ngā ara mātauranga/whakawhitinga me te whakawhanake Pasifika. He mema a Stuart o te Wānanga Whakawhiti Rāngai o te Minita mō te Whakapiki Paetae, me te Rōpū Tohutohu Pūtāhui Taiohi. Kua mahi ia hei mātanga puna noa i Te Moananui-a-Kiwa, kua whakaako i ngā kura maha o Tāmaki Makaurau ki te Tonga, tae atu hei Tumuaki o te Kāreti o Aorere, me Te Kāreti Akoranga o Tāmaki Makaurau. I te tau 2010 i whiwhi a Stuart i te tohu hei Officer of the New Zealand Order of Merit mō ana mahi mātauranga.

John Chemis

I tēnei wā ko ia te Tumu Whakarae o Eastbay REAP, ā, e horapa ana ngā ratonga o taua whakahaere ki te rāwhiti o Te Moana-a-Toi. E mahi ana a REAP puta noa i ngā rāngai me ngā rōpū pakeke katoa e tautoko ana i ngā whai wāhitanga mātauranga ki ō tātou hapori tuawhenua. Ko te aronga matua ko te whakatutuki i ngā hiahia me te whakaputa i ngā painga. Mā tōna kapapori whakaako, whakahaere matua hoki i ngā kura tuatahi, tuarua me te mātauranga matua, tāpiri atu ki te neke atu i te 20 tau e kaha whai ana i ngā mahi kāwana i aua rāngai katoa tae atu ki te kōhanga reo, e kawea ana e John he ara mahi e āta whai wāhi ai ngā whakaaro o ōna hapori. Ko ōna tino arotahi ko te noho i te taiwhenua, te whakawhanake hapori me te mahi ki te whakatutuki i ngā wawatatanga o te Māori me ō te ākonga.

Ruma Karaitiana

He kaiwhakahaere kamupene tautōhito a Ruma, ā, he roa ia e mahi ana i ngā taha whakahaere, mātanga me te pakihi. I nā noa nei ka rītaia i tana mahi neke atu i te tekau tau te roa hei Tumu Whakarae o te Building and Construction Industry Training Organisation. Ahakoa kua pau i a ia te nuinga o ōna tau mahi e mahi ana i te whakahaere arumoni, e kaha tonu ana tana whai wāhi ki te mātauranga mā ngā tūnga kāwana me te whakaako harangotengote. I kawea e ia ngā tūnga kāwana, whakaako hoki i te rāngai mātauranga matua me te rāngai mātauranga whakature, me tōna tino aro ki ngā tikanga whakaako e pā ana ki te ako i te taiao matihiko, tawhiti anō hoki.

Ko ia te heamana i tēnei wā o te wāhanga arumoni o tōna Iwi i muri i te whakataunga i waenga i te Iwi me te Karauna, ko ia he mea hoki o ngā poari o te Education Services Ltd me te The Central Energy Trust. He kanohi anō hoki mō tōna iwi i te Rōpū Matua o te kōkiri whakawhanake ohaoha, o Accelerate25.

Mele Wendt

E 24 tau e mahi ana a Mele i te rāngai mātauranga, hei kaiwhakaako kura tuarua, i muri hei kaimahi i Te Whare Wānanga o Te Ūpoko o Te Ika a Māui i whakapūmautia rā e ia ngā ratonga/mahi rapu kaimahi mā ngā ākonga Pasifika me ō rātou whānau. Kua mahi hoki a Mele hei Pou Whakahaere o Te Tūāpapa Mātauranga o Aotearoa Me Amerika. I ēnei tau e rua me te haurua e mahi ana a Mele hei mātanga i ngā wāhanga pēnei i ngā karahipi, te mahi kāwana, te whakawhanaketanga o ngā iwi o Te Moananui-a-Kiwa, me te whakapakari kaha i ngā whakahaere.

E 20 tau te roa e mahi ana ia i ngā mahi kāwana, ā, i tēnei wā ko ia te Heamana o te poari o te Pasifika Education Centre. Kua rua a Mele e noho ana hei mema o te Institute of Directors, me te kaha o ana mahi hei mema o PACIFICA, o te Whatunga Pakihi Pasifika o Te Whanganui-a-Tara, o Ngā Kaihautū Wāhine o Te Whanganui-a-Tara, me te SuperDiverse Women, me te mahi hei pou whakaruruhau ki ētahi wāhine āhua pūhou. He Hāmoa ia (Malie, Lefaga, Vaiala) me te palagi (Aotearoa, Peretānia), ā, i tupu mai i Hāmoa me Whītī.