He kōrero mō Te Aho o Te Kura Pounamu - e mōhiotia nei ko Te Kura
He akoranga e hāngai ana ki tō ao.
I Te Kura, ka āta whakaritea e mātou ō akoranga kia hāngai tonu ki a koe - tō huarahi ako, ngā mea e kaingākaunuitia ana e koe me te tautoko hoki e hiahiatia ana e koe. E āhei ana koe ki te ako mai i te kāinga, i te kura, i tētahi atu wāhi rānei e pai ana ki a koe, ā, ka whai wāhi mai hoki tō whānau ki tō ara ako.
Hei ākonga o tō mātou kura, ka āwhina ā mātou kaiako i a koe ki te ako i ngā ara e tika ana mōu, tō ao onāianei me ō whāinga mō tō anamata.
E āhei ana koe ki te tīmata i Te Kura ahakoa tō pakeke. Ka tautoko mātou i te hunga kōhungahunga tae atu ki ngā taiohi me ngā pakeke, ā, ko ā mātou marautanga ka tīmata mai i te kōhungahunga tae atu ki te Kaupae 3 NCEA.
Ahakoa kei te tōmuri koe i roto i āu mahi, kei te koke whakamua rānei, kei konei a Te Kura hei āwhina i a koe me tō whānau mai i te tīmatatanga tae noa atu ki te whakamutunga.
On this page
Tā mātou kaupapa
Ko koe te pūtake o ā mātou mahi katoa.
Ahakoa kei hea koe, ko wai koe, nō hea rānei koe, kei konei mātou hei āwhina i a koe i roto i te katoa o ōu akoranga. Ko ngā mōhiohio katoa mō ngā huarahi maha e āwhina ai mātou i ā mātou ākonga me ō rātou whānau, ka kitea i tēnei paetukutuku.
He motuhake te ao Māori ki a mātou o Te Kura, ka tautoko mātou i ngā ahurea katoa, ā, he ngākau titikaha tō mātou kia whakaūngia/ whakamanatia Te Tiriti o Waitangi.
Tūhura i ā mātou kaupapa
Ō mātou uara
Ko ā mātou mahi o ia rā ēnei.
Ko koe me tō whānau kei te pokapū o tā mātou kaupapa. Ko ō mātou uara e toru, arā, ko te Manaaki, Whanaungatanga me te Tika ka ārahi i a mātou i roto i ā mātou mahi katoa. Ko tēnei te ara e mōhio ai mātou kei te whakaarohia nuitia koe - e rangona ana tō reo, e tautokona ana hoki koe.
Ngā Uara o Te Aho o Te Kura Pounamu - ō mātou uara
- Manaaki – tā mātou āhua mahi (he whakaatu i te whakaute, te manaakitanga me te manaaki)
- Whanaungatanga – tā mātou mahi ngātahi (tō mātou whakakaha ake i ngā hononga me te tūrangawaewae)
- Tika – ā mātou tikanga (te whakaatu i te tika me te pono)
- Kei te pokapū te ākonga – E ārahi ana i ā mātou whakataunga
Ko tā mātou whāinga kia rangona ēnei uara e te hapori ā-kura i roto i ngā tauwhitiwhiti katoa me Te Kura.
He tirohanga ki ō mātou uara
Tō mātou hītori
He kōrero mō mātou hei tūhono i te herenga tangata.
Kua roa nei a Te Kura e tū ana; neke atu i te kotahi rau tau a Te Kura e tū ana. I tōna tīmatanga i te tau 1922, kotahi rau ā mātou ākonga. Ka whiwhi rātou i ā rātou mahi mā te pouaka mēra, ā, ka tukuna atu ā rātou mahi kia mākahia e te kaiako tuatahi o Te Kura, e whaea Janet Mackenzie. Ko ia anake te kaiako o Te Kura i taua wā.
Kua huri te ao ināianei, ka mutu, kua tino whanake mātou. Ināianei neke atu i te 30,000 ngā ākonga ka kuhu mai ki tō mātou kura ia tau, ā, neke atu hoki i te 1,000 ngā kaiako ka āwhina i a rātou me ā rātou akoranga. Nō reira, ko mātou te kura nui katoa o Aotearoa. He mea whakamīharo tērā!
Kei te hiahia mōhio koe i ētahi atu kōrero mō tō mātou hītori?
Mai i te tautoko i ngā tamariki 25, tae atu ki te tautoko i te tokomaha o ngā ākonga ia tau, i tīmata a Te Kura i te tokoiti, nāwai rā ka tokomaha! Pānui mō ētahi o ngā mea kua tutuki i a mātou i te rau tau kua hori.
Ō mātou wāhanga
Ako mō ngā wāhanga rerekē o Te Kura.
Kua whakarōpūhia a Te Kura ki ngā wāhanga rerekē e whā.
Te Whakarato Akoranga
Ka mahi tahi ngā kaiako me ngā kaimahi puta noa i ō mātou rohe e whitu ki ngā ākonga me ō rātou whānau kia whai wāhi ai rātou ki ngā āwhina e whakawhiwhia ana ki te katoa. Ka hono atu hoki ngā kaimahi ki ngā kura ā-rohe, ngā rōpū ā-hapori me ngā pokapū kāwanatanga hei whai āwhina ki te maha o ngā arawātea ako. Ko te Tīma Tautoko Ākonga me te Whānau kei te whakahaere i tā mātou pokapū whakapā.
Te Rōpū Whanaketanga o Te Kura
Ka manaaki, ka waihanga hoki te wāhanga nei i Te Ara Pounamu - tā mātou Marautanga ā-rohe. Ka waihanga, ka āta titiro hoki te rōpū nei ki ngā rauemi ako me ngā aromatawai ka whakamahia e koe i My Te Kura. Ka mahi tahi hoki te rōpū nei ki a NZQA kia kitea mēnā e hāngai ana ā mātou tohu ki ō akoranga.
Ngā Pūnaha me te Tautoko
Ko te Rōpū Rauemi Mōhiohio, te Rōpū Pūtea me te Rōpū Tāngata me te Āheitanga e mahi tahi ana hei tautoko i ngā kaimahi me ngā ākonga mā ngā pūnaha me ngā tukanga huhua kia pai tonu ai te haere o ngā mahi a Te Kura.
Te Tari o te Tumu Whakarae
Ko ngā kaimahi o tēnei wāhanga kei te tiaki i ā mātou pāpāho ā-kura, i ngā tutukinga ā-kamupene, i te whakamahere me te pūrongo me tā mātou anga kaupapahere. Ka tautoko, ka tuku āwhina hoki te tīma ki Ngā Kaihautū Tīma me te Rūnanga Kura.