Te akoranga hangore i Te Kura
Te tautoko i te angitūtanga a te ākonga.
Tērā pea kua kite koe, kāore mātou i rite ki ētahi atu kura. E mōhio ana mātou kotahi noa iho tō āhua motuhake – koirā te mea e hira ai koe.
E mōhio ana hoki mātou he āhuatanga motuhake ōu, he pūmanawa ōu, he kaha anō hoki ōu. E pōhiri atu ana mātou i a koe me tō whānau katoa kia hono mai ki a mātou i tō huarahi ako.
Ka whakaritea e mātou ngā tautoko katoa e hiahiatia ana e koe kia angitu ai koe, ā, ka whakawhiwhia koe ki te mana ki te whakatau me pēhea tō whakatutuki i aua whāinga. Koinei te akoranga hangore.
E hiahia ana mātou ki te āwhina i a koe kia rongo koe i te hononga i a koe e ako ana i tōu ake huarahi. Ka tautoko mātou i a koe kia tū hei mema kaha, māia, motuhake, āhei hoki ki te whakahaere i a koe anō i roto i tō hapori.
On this page
Ngā aratohu ako o Te Kura e angitū ai te ākonga
Inā hono mai koe ki Te Kura, ka uru mai koe ki tētahi tīma. Kua waihangatia ā mātou aratohu ako hei āwhina i ngā ākonga, ngā whānau me ngā kaitautoko kia mahi tahi ai. Kua waihangatia ēnei hei waihanga i tētahi taiao ako tautoko, angitu hoki kia puāwai ai koe i Te Kura.
Ka whakamārama hoki mātou i ngā whakaritenga whai wāhi kua whakaritea e Te Manatū Mātauranga.
Mēnā ka uaua ngā āhuatanga ki a koe, whakapā mai kia mōhio ai mātou – kei konei mātou hei āwhina!
Te Ara Pounamu
Ngā akoranga kua waihangatia māu.
Ko Te Ara Pounamu tā mātou marautanga ā-rohe e whakaata ana i te mātauranga o te akoranga Big Picture. Ka noho ko ngā āhuatanga pai rawa atu o ngā marautanga ā-motu o Aotearoa, hei whakatinana kia hāngai ai ki a koe. Ko koe tonu kei te pūtake o ēnei mea katoa – ō hiahia, ō pūmanawa, me ō whāinga mō āpōpō. Ka hono a Te Ara Pounamu i tō ako ki tō ao o nāianei, ā, ka āwhina ki te whakakā i te ara mō āpōpō.
Ngā Mātāpono - ngā mātāpono aratohu o Te Ara Pounamu
Te whakanoho i ngā ākonga me ō rātou whānau ki te pūtake.
E arahina ana a Te Ara Pounamu e ngā mātāpono e rima e kitea ana i te hoahoa ako o Te Kura:
- Whakawhanaungatanga
- Māramatonutanga
- Whaitake
- Kotahitanga
- Whakamana
I takea mai i te tirohanga Māori ki te ao, kua rarangahia ēnei mātāpono puta noa i ngā Ara Ako – ngā ara o te ako, me Taku Korowai – tō Mahere Ako Whaiaro (PLP).
Ara Ako – ngā huarahi ako mo Te Ara Pounamu
Huarahi rerekē, haerenga ōrite.
Neke atu i huarahi kotahi te ako i Te Kura. I roto mai i te huarahi ako o Ara Ako ka āhei koe ki te tūhura:
- Whakaaro ā-marau: He whānuitanga o ngā kaupapa ako kei roto i ia wāhanga marautanga.
- ConnectED: He ako tuitui puta noa i ngā wāhanga marautanga.
- EXPlore: Akoranga ā-kaupapa, tae atu ki ngā ngākau nuitanga motuhake, ngā mahi pāpori, me te whakaaro hoahoa.
- Huinga Ako: Kanohi ki te kanohi me ngā āheitanga akoranga ā-tuihono ki ngā hoa ākonga.
- He Whai Taumaru | Leaving to Learn: Te tūhura rapuara, ngā mahi ā-hapori, me te ako i waho atu i te akomanga.
Ka taea e koe te whakamahi i ia horopaki ki te waihanga i tētahi mahere ako e hāngai ana ki a koe, e whakapakari ana i ō pūkenga me tō mātauranga, mā ia kaupae.
Taku Korowai - Tō Mahere Ako Whaiaro
Tō mahere, tō ahunga whakamua.
Ko Taku Korowai, tō PLP. Ka waihanga koe i tō mahere me tō kaimanaaki me tō whānau, mā te raranga tahi i ō whāinga, ngākau nuitanga me tō ahunga whakamua puta noa i ngā Ara Ako. He taputapu hei āwhina i a koe ki te whai i tō haerenga, te huritao ki tō ako, me te whakamahere i ō hikoi e whai ake nei.
Me whakaaro ake koe nāu ake tēnei korowai; he mea motuhake nāu, he mea hanga kia hāngai ki a koe.
My Te Kura - tā mātou tūāpapa ako ā-ipurangi
Akoranga tuihono i waihangatia māu.
Ko My Te Kura te wāhi e ako tuihono ai koe me mātou. He wāhi haumaru, tūmataiti hoki, he ngāwari ki te whakamahi, ā, ka āwhina i a koe kia ū tonu ki āu mahi, me te tuku anō i te herekore e wātea ai koe ki te mahi i ō mahi i te wā e hiahia ana koe.
Ko My Te Kura te wāhi e taea ai e koe te uru atu ki ngā rauemi ako, te tuku ake i āu mahi mō te aromatawai me ngā whakahokinga kōrero, me te tuku karere ki tō kaiako. Takiuru atu kia kite ai koe i ō akoranga, tētahi pānui kōrero mō ngā pānui hou, ngā papa karere, ngā ataata, me ngā hononga ki ō karaehe ā-ipurangi. Ka āhei koe ki te whakamahi i ngā taputapu pēnei i a Microsoft 365 me ētahi atu taupānga e hono ana ki My Te Kura. Ka whakarato hoki mātou i te uru ki ngā tūāpapa tuatoru kua whakaaetia hei tautoko i tō ako.
Ka tino pai te mahi a My Te Kura i runga i ngā rorohiko papamahi me ngā rorohiko kawekawe – ko tāu anake he hononga ki te ipurangi me ō taipitopito takiuru My Te Kura. Ki te kore e taea e koe te whakamahi i te ipurangi, mēnā rānei he uaua ki a koe te hono ā-ipurangi, kei konā ētahi kōwhiringa tautoko e wātea ana ki a koe. Ka whakapau kaha mātou ki te whakarite kia tutuki āu mahi.
Taku whakaaturanga o My Te Kura
Pāwhiria te pātene kei raro iho nei, ā, whakamahia ngā taipitopito takiuru kua tukuna atu kia uru atu ai koe ki tētahi whakaaturanga o ngā kōwae ako ā-ipurangi mai i ngā wāhanga marautanga katoa.
Ingoa kaiwhakamahi: whakaaturanga
Kupuhuna: whakaaturanga
Te kirirarautanga matihiko me te haumaru ā-ipurangi
Kia atamai. Kia haumaru. Kia mākoha.
I a koe e ako ana ā-ipurangi, he mea nui kia mōhio koe me pēhea te noho haumaru me te whakamahi whakaaro nui i te ipurangi.
Ko te tikanga o te kirirarautanga matihiko ko te:
- Whakahaumaru i ō pārongo whaiaro
- Te whakaute tangata
- Te tautohu i ngā āhuatanga mōrearea
- Te mōhio ki te mea pono me te mea kāore e pono ana
Ka ako koe i ēnei pūkenga hei wāhanga o tō haerenga ako ā-ipurangi me Te Aho o Te Kura Pounamu. Kia maumahara, ehara i te mea me mahi koe ko koe anake. Kōrero ki tō whānau ki ngā mea e ako ana koe ā-tuihono nei, kia tautoko ai rātou i a koe.
Ka whakarato a Netsafe i ngā pārongo me ngā rauemi haumaru ā-ipurangi māu me tō whānau.