Ngā kaimahi, ngā tūranga mahi Our people, our roles

Tō mātou hapori o Te Kura

Tūtaki mai ki ngā tāngata ka āwhina i a koe ki ngā mahi ako i Te Kura.

He tīma nui tō Te Kura e mahitahi ana kia āwhinatia ngā ākonga ki te ako i roto i ngā huarahi e hāngai ana ki a rātou. He mahi tā te katoa i roto i tō huarahi ako kia māmā ai, kia hāngai ai ki ō hiahia, ā, kia tautokona koe- ahakoa tuihono, kanohi ki te kanohi, i roto rānei i te hapori. Ka noho kotahi tātou katoa kia rongo ai koe i  te wairua āwhina.

Ka mahitahi te katoa kia tau ai tō noho me te noho a tō whānau, kia tau ai koe i raro i ngā manaakitanga, e rite ai koe ki te ako.

Ā mātou ākonga

He rerekē te hīkoitanga o ia ākonga – ka mutu,

I Te Kura he rerekē te āhua o ngā ākonga katoa. Ko ētahi ka noho ki ngā tāone nui, ko ētahi ka noho tawhiti i ngā kura pēnei i te noho pāmu. He matea oranga, he puna āwhina rānei tō ētahi o ā mātou ākonga, he pukumahi me ā rātou hākinakina, kaupapa ahurea rānei.  Nā te mea he mahi kē atu ā ētahi, he uaua mō rātou ki te haere ki tō rātau kura haukāinga, ko ētahi atu, ka hiahia rātou ki te whakamātau i tētahi huarahi rerekē ki te ako.

Tērā pea ka hiahia koe ki te mahi i āu mahi katoa i Te Kura, te mahi rānei i ētahi o ngā kaupapa mēnā kei te ako koe ki wāhi kē atu.

Nā te mea ka ako mātou mā te tuihono i te nuinga o te wā, kei a koe te tikanga o ngā haora ka ako koe.  Kei a koe te tikanga o te wā me te wāhi ka ako koe – mēnā i te kāinga, i te whare pukapuka, i te whare o tētahi mema o te whānau, i tētahi Huinga Ako rānei. He kaupapa pārekareka ēnei ka whakahaerehia ia wiki hei whakakotahi, hei tuku pātai, kia whai wāhi hoki koe ki tō rōpū ako.

E whaipānga ana tāu akoranga ki ō hiahia. Ka mahitahi tō kaimanaaki ki a koe ki te hanga i tētahi mahere ako e hāngai ana ki a koe.

Ahakoa he kura ako tawhiti a Te Kura, e kore koe e ako me tō kotahi. Kei konei tō kaimanaaki rātou ko tō kaiako me tō rōpū manaaki ki te āwhina i a koe, ā, e āhei ana hoki tō whānau me ō hoa ki te whai wāhi atu ki tō huarahi ako. Ko tō mātou hiahia kia whakahīhī koe ki tō kāwai whakapapa me ō pūkenga ka haria mai e koe ki Te Kura, tae atu ki ō hiahia mō te anamata.

Kei te rite tō rōpū manaaki ki te āwhina i a koe

Ngā kaiāwhina me te whānau

He kaitohu whakapono e āwhina ana i a koe kia ū tonu ki tō huarahi i ngā wā katoa.

He wāhanga motuhake tō ngā Kaiāwhina me te whānau ki te akoranga o te tokomaha o ngā ākonga o Te Kura. Mā te āwhina tika i te kāinga, ka ū tonu te ākonga ki āna mahi, ka māia ake, ā, ka pārekareka ki a ia te ako i tētahi huarahi e hāngai ana ki ōna pūkenga.

He aha te take me whai kaiāwhina ngā ākonga ukiuki?

Ka āwhina ngā whānau me ngā kaimanaaki i a koe kia haumaru, kia manawaroa tō ako. Ka āwhina rātou ki te whakamahere, ki te ārahi i tō hōtaka ako me te āta titiro ki tō kokenga, ā, ka noho tonu ēnei āwhina i ngā wā katoa hei whakaohooho tonu i a koe me te whakawhanake i tō mana motuhake.

He aha hoki te mahi a te kaiāwhina?

He nui ngā momo āwhina a ngā kaiāwhina me ngā whānau i te huarahi ako o te ākonga! Ia rā ka āhei tō kaiāwhina ki te āwhina i ō akoranga:

• te whakarite i tētahi wāhi pai hei ako
• te whakaheke i ngā pīroiroi
• te āta titiro tahi ki te mahi me te kokenga
• te āwhina i tō oranga

Ehara te kaimanaaki i tō kaiako - he tangata ārahi, whakakipakipa, āwhina hoki i a koe kia tutuki i a koe ō whāinga ako.

He āwhina mō ngā kaiāwhina me te whānau?

Ka hono atu tō kaiāwhina me tō whānau ki tō kaimanaaki me tō kaiako o Te Kura i ngā wā e hiahiatia ana. Ka āhei Te Puna Manaaki Ākonga o Te Kura ki te āwhina i a koe me tō kaiāwhina ki te whakarite i ngā mahere ako, te whakautu i ngā pātai me te ārahi i āu akoranga anō hoki.

Mēnā ka hia āwhina ngā kaiāwhina, ngā whānau rānei me te hangarau mōhiohio, te uru atu rānei ki ngā rauemi tautoko, ka taea e rātou te waea atu ki Te Puna Manaaki Ākonga me te Whānau.

Nama waea: 0800 65 99 88 kōwhiringa 2 (Mane ki te Paraire, 8 i te ata ki te 5 i te ahiahi)

Īmēra: hub@tekura.school.nz

Te mahitahi ki ngā kaiāwhina me te whānau

Tō mātou Tīma Kaihautū

Te ārahi i ngā kaimahi o Te Kura ki te tutuki i ō mātou whāinga ā-rautaki.

Ko te mahi a te Tīma Kaihautū o Te Kura he ārahi. Ko te tīma nei ko te Tumu Whakarae, Ko ngā Tumu Whakarae Tuarua, ko te Kaitohutohu Matua me ngā Kaihautū ā-motu o ia wāhanga. Ko rātou ka whakatau i ngā take o ia rā mō ngā whakahaerenga o Te Kura me te huarahi pai katoa hei tautoko i ngā ākonga me ngā kaimahi puta noa i te kura.

Te Rūnanga Kura

Ko te ārahi i Te Kura ki te huarahi o te tika mō ngā ākonga me ngā whānau

He rōpū iti te Rūnanga Kura. He mātanga i roto i te Mātauranga e whakatau ana i ngā take nui me te mahere pae tawhiti o Te Kura. Ehara i te mea e pēnei ana i ngā kura i Aotearoa, i te wā ka tohua ngā mema o te rūnanga kura e ngā whānau. Ko ngā mema o te rūnanga kura o Te Aho o Te Kura Pounamu ka tohua e te Minita o Te Mātauranga.

Ko tā te rūnanga kura he āta titiro mēnā e whai ana a Te Kura i te ture, e whakamana ana i Te Tiriti o Waitangi, ā, ka whakatutuki  i ngā whāinga i whakaaetia hei tautoko i ngā ākonga ki te whakatutuki i ō rātou hiahia. Ko ngā mahi o ia rā ka waiho mā te Tīma Kaihautū Matua hei whakahaere engari, ka huitahi i ētahi wā o te tau ki te arotake me te ārahi i ngā āhuatanga o Te Kura.

Ngā hononga hapori

Te tūhonohono i ngā tāngata ki ō rātou hapori.

I te tau 2008, i whakatū mātou i tētahi tari ā-rohe me te Huinga Ako puta noa i Aotearoa. Ko te hiahia kia whakapakari i ngā hononga i waenga i ngā ākonga, ō rātou whānau me ngā hapori. Nā te whakapiki i te tokomaha o ngā kaimahi e mahi ana huri noa i te motu, i taea ai e mātou te tuku āwhina huhua noa, ā kanohi anō hoki ki te ākonga. Ka mahitahi ā mātou kaiako me ngā kaimanaaki i te ākonga me te whānau ki te tuku akoranga me te hauora i te wā e hiahiatia ana.

Ko ia tari ā-rohe he tari mō ngā kaiako ō reira tonu me ngā kaiako tautoko. He kaihautū ā-rohe, he kairuruku hononga anō hoki tō Te Kura e mahitahi ana ki ngā rōpū o te hapori, ngā umanga kāwanatanga, ngā kura me ngā ratonga ā-kura hei āwhina i ngā ākonga kia pāhekoheko me te whakatutuki i ō rātou whāinga.

Ka hono mātou ki ngā kaiwhakarato mātauranga me ngā pakihi mō ngā ākonga tāukiuki Tau 11 ki te Tau 13 me ngā ākonga taiohi, kia whai wāhi atu te ākonga ki ngā akoranga o te rāngai mātātoru, he whai wheako rānei o tētahi mahi e hiahiatia ana e ia. Ka āwhina tēnei i te ākonga ki te whakawhanake i tōna mātauranga, mōhiotanga me ōna pūkenga mō tana kōwhiringa aramahi i te wā e whai tonu ana ia i tētahi tohu whai tikanga.

Ka whakakanohi ā mātou ākonga me ngā kaimahi o Te Kura i ngā kaupapa ā-rohe, ā-motu hoki pēnei i Te Matatini, te Polyfest, Maadi Regatta, ngā  Whakaaturanga Toi me ētahi atu kaupapa hoki.