Te tautoko rorohiko me te hononga ipurangi Laptop and connectivity assistance

• he rorohiko pōnaho e tika ana mā ia ākonga.
• $30 ia marama hei tautoko i te utu mō te hononga ipurangi mā ia ākonga.

Ka taea e koe te tono mā te ipurangi, mā tā mātou taputapu tono LAC.

Mēnā kāore e taea e koe te tono mā te ipurangi, he pātai rānei āu, tēnā, whakapā atu ki tō mātou tīma Tautoko Ākonga me te Whānau.

Hei tono mā te waea, waea atu ki 0800 65 99 88, kōwhiringa 2 (Mane ki te Paraire, 8.00 i te ata ki te 5.00 i te ahiahi).

Īmēra: hub@tekura.school.nz

Ka whakamōhiotia koe mō te putanga o tō tono mā te īmēra.

Mēnā ka whakaaetia tō tono mō tētahi pūrere, ka tono mātou kia whakaūngia tō wāhitau tukunga. Tērā pea ka toru ki te tekau ngā rā mahi hei whakarite i te tukunga.

Ka tukuna ngā pūrere mā te kaikawe, ā, me haina rawa tētahi tangata i mua i te whakaaetanga o te tangata kawe ki te waiho i te pūrere. Kāore te kaikawe e waiho i te pūrere ki te wāhitau mēnā kāore he tangata i te kāinga hei haina.

Mēnā ka whakaaetia koe mō tētahi pūtea tautoko ipurangi, ka utua tikatia e Te Kura taua pūtea ki tētahi pūkete pēke ia marama kua whakamanahia.

Mēnā kāore anō ō hononga ipurangi i tō kāinga me whakarite koe i tētahi hononga me tētahi kaiwhakarato e hiahiatia ana e koe.

Inā whakaaetia tō tono, ka tukuna he īmēra ki a koe me tētahi hononga haumaru hei tāpiri i ō taipitopito pūkete pēke ki tētahi tomokanga haumaru mō ngā pūkete pēke.

Ka utua noa ihotia ngā utu mēnā kei a Te Kura ō taipitopito pūkete pēke o nāianei.

I raro i ngā āhuatanga motuhake, tērā pea ka whakaae a Te Kura ki ngā tono ā ngā ākonga me ngā whānau kāore i whakatutuki i ngā paearu whakauru. Mēnā e hiahia ana koe ki te tuku tono i raro i ngā āhuatanga motuhake, tēnā kōrero atu ki tō Kaimanaaki.

Kei roto pea i ngā āhuatanga motuhake ko ēnei e whai ake nei:

• uauatanga pūtea
• he panonitanga ki ngā āhuatanga o te whānau, o te tangata rānei
• he aituā taiao, he ohotata kē atu rānei
• kua tukuna tētahi tono mō tētahi penihana, mō tētahi Kāri Ratonga Hapori rānei, engari kāore anō kia whakaaetia.

E wātea ana te āwhina mō te rorohiko pōnaho me te hononga ipurangi i te wā anake kei Te Kura koe. Inā kāore koe e whakauru ana ki Te Kura, ka whakaritea e Te Kura kia whakahokia mai te rorohiko pōnaho, ā, ka mutu hoki ngā utu pūtea tautoko ipurangi.

E mārama ana mātou:

• E whakapono ana hoki mātou he tika katoa ngā kōrero kua tukuna, ā, e mārama ana hoki mātou tērā pea ka whakamutua tonu te āwhina ipurangi mēnā ka kitea e hē ana tētahi o aua kōrero
• Mō te aromatawai i tēnei tono, tērā pea ka rapu a Te Kura i te whakaū mai i ētahi atu tari kāwanatanga mō ngā kōrero kua tukuna e mātou
• Kāore te ākonga i whakaingoatia e whai wāhi atu ana ki tētahi pūrere me tētahi hononga ipurangi, ā, kāore ā mātou huarahi hei whakarato pūrere hononga ipurangi hoki
• Ka taka te haepapa ki te kaitono ki te utu i te hononga ipurangi mā te ākonga i whakaingoatia, ā, ka riro hoki i a ia ngā pūtea tautoko ka tukuna e Te Kura.
• E whakaae ana mātou ki te kawenga, ki te whakarite kia toro atu te ākonga ki ngā ihirangi e tika ana i runga i te ipurangi, ā, kia mōhio hoki ia ki te kaupapa here kirirarautanga matihiko a Te Kura.
• Me whakaoti mahi kura te ākonga i whakaingoatia kia kotahi neke atu i ia rua wiki mā My Te Kura, te tūāpapa ako tuihono. Ki te kore e pēnā, me whakahoki te rorohiko pōnaho ā, ka mutu hoki te pūtea tautoko hononga ipurangi.
• Mēnā ka tukuna mai he pūrere, ka tiakina paitia kia kore ai e pākaru, e ngaro, e tāhaetia rānei. Kāore a Te Kura e whakakapi i ngā pūrere kua tūkinohia, kāore rānei e tika ana te manaakitia
• Ka pūrongotia ngā raruraru katoa e pā ana ki te pūrere ki Te Kura i te tuatahi. Īmērahia tō mātou tīma Tautoko Ākonga me te Whānau mā te hub@tekura.school.nz, waea atu rānei ki 0800 65 99 88, kōwhiringa 2.

E whakaae ana ahau ki te rīpoata atu ki ngā Pirihimana mō te ngaronga o te pūrere nā te tāhae whare i roto i ngā rā e whitu, ā, ka tuku hoki i tētahi tārua o te pūrongo pirihimana ki Te Kura. Kāore a Te Kura e whakakapi ana i ngā pūrere kua ngaro, kua tāhaetia rānei, mēnā kāore he tārua o te pūrongo pirihimana.

E whakaae ana ahau ki te rīpoata ki Te Kura mō tētahi pākarutanga, ngaronga rānei, ahakoa te take, i roto i ngā hāora e 24, ā, ka tuku hoki i ngā kōrero katoa mō ngā āhuatanga i pā ai taua take. Me whakahoki ngā pūrere katoa kua pākaru ki Te Kura kia taea ai te tuku anō i tētahi atu pūrere.

E whakaae ana ahau ki te whakamōhio wawe atu ki Te Kura mēnā kāore te ākonga e whakauru wā-katoa ana, kua kore rānei ia e whai mana ki te noho hei ākonga o Te Kura, kua whakakorea rānei tana whakaurunga wā-katoa ahakoa te take. E whakaae ana ahau me whakahoki te pūrere, ā, me mutu hoki te pūtea tautoko hononga ipurangi i taua wā.

E mārama ana ahau, tērā pea kua tāutahia ki runga i te pūrere he pūmanawa aroturuki wāhi me te pūmanawa tautoko mamao hei ārai i te ngaronga o te pūrere, ā, hei whakarato hoki i te tautoko mamao. Ko ngā pārongo whaiaro katoa ka kohia e Te Kura me āna kaiwhakarato rānei mō tēnei kaupapa ka whakahaerehia kia hāngai ki ngā whakaritenga o te Ture Tūmataiti 2020.