Te mahi tahi
E ū ana mātou ki tō angitūtanga.
I Te Kura nei, ka noho koe ki te pūtake o tō ako mā te tuku i tētahi hōtaka ako whaiaro ki ā mātou hōtaka. I roto i te rau tau, kua ako mātou i te huarahi pai katoa ki te tautoko i ā mātou ākonga me ā rātou akoranga. Tirohia he pēhea te whakahaere o te ako puta noa i ngā reanga rerekē, ka pēhea hoki tā mātou tautoko i a koe me tō whānau, ā, ka pēhea hoki tā tātou mahi tahi kia angitu ai koe.
Te ako me Te Kura
On this page
Tūhuratia ā mātou hōtaka
Te mahi tahi me ngā ākonga pakeke
Hīkina te mānuka, parahia tāu ake huarahi.
Mēnā kua 20 ō tau neke atu rānei, ā, e hiahia ana koe ki te whai i te tohu NCEA, ki te ako rānei i tētahi mea hou – kei konei mātou hei tautoko i a koe. He tuihono te āhua o te ako, ā, he ngāwari, ka hāngai ki tō kātū noho. Ahakoa kei a koe te haepapa ki te whai wāhi ki tō hōtaka ako, ka tautokona koe e ō kaiako, ā, ka whakahoki kōrero hoki ō kaiako ki a koe mō ia kaupapa ako.
Tirohia he kōrero atu anō mō ngā ara e tautoko ai mātou.
Ka āhei hoki koe ki te whakapā atu ki tō mātou Puna Manaaki Ākonga me te Whānau mō ngā pātai e hāngai ana ki te akoranga tuihono.
Waea: 0800 65 99 88 kōwhiringa 2 (Rāhina ki te Rāmere, 8 i te ata ki te 5 i te ahiahi)
Īmēra: hub@tekura.school.nz
Te mahi tahi me ngā ākonga o tāwāhi
Me noho hono tonu, i te wā kei wāhi kē koe.
Mēnā kei tāwāhi koe e noho ana, ka āhei tonu koe ki te ako i Te Kura. Ka tuku mātou i ngā hōtaka whaiaro tuihono kua āta whakaritea mā ia ākonga, ā, e hāngai ana ki te Marautanga o Aotearoa, ka taea hoki te toro atu i ngā wāhi katoa o te ao. He pai tēnei whakaritenga mā ngā whānau e tāpoi ana mō ā rātou hākinakina, e mahi ana i tāwāhi, e hāereere ana ki ētahi atu whenua o tāwāhi.
E mōhiotia ana he tino pukumahi ngā ākonga o tāwāhi engari mā te tika o te tautoko i a rātou e taea ai e rātou te whakatutuki i ā rātou whāinga ako.
Ka āhei koe ki te whakamātautau NCEA i tāwāhi mō ngā paerewa paetae aromatawai ā-waho mēnā ka tutuki i a koe ētahi tikanga motuhake:
- E noho ana koe ki tāwāhi i te wā o ngā whakamātautau NZQA i Aotearoa – mai i te tīmatanga o Whiringa-ā-rangi tae noa ki Hakihea.
- Kua whakaurua koe hei ākonga ukiuki, he ākonga utu rānei koe nō tāwāhi.
- Ka tutuki i a koe ngā whakaritenga katoa a NZQA, pērā i te whakarite whakahaerenga e tika ana.
Kei te paetukutuku a NZQA te roanga atu o ngā mōhiohio.
Mēnā he pātai āu mō tā mātou kaupapa Tāwāhi | Overseas, tēnā whakapā atu mā te īmēra ki tō mātou tīma motuhake, ki: overseas@tekura.school.nz
Pānuitia he kōrero atu anō mō ā mātou paearu whakauru me gateways.
Te mahi tahi me ngā kaiwhakahaere me ngā whānau
Māu e ārahi, mā mātou e tautoko.
Ka taea e ngā kaiwhakahaere me ngā whānau te āwhina ngā ākonga ki te whakahaere i ā rātou akoranga i te kāinga. Ka tautoko mātou i ngā kaiwhakahaere mā te ārahi, te tuku pārongo, tae atu ki tētahi utu hei tautoko i ngā ākonga ukiuki e māraurau ana. Ehara i te mea me noho koe hei kaiako – me ngākaunui noa iho ki te āwhina.
Tirohia he kōrero atu anō mō te mahi a te kaiwhakahaere i Te Kura.
Te mahi tahi me ngā ratonga takirua me ngā kura
Te whakapakari pātuinga hei tautoko i ā mātou ākonga.
Ko ētahi ākonga ka whakauru tahi ki Te Kura me tō rātou kura matua i te wā kotahi. Ka mahi tahi mātou me tō kura ki te tuku i ētahi atu kōwhiringa ako, ki te whakakī āputa wātaka, ki te tautoko rānei i ngā wā ohotata. Ka mahi tahi te katoa ki te āwhina i a koe kia angitu ai.
Tirohia he kōrero atu anō mō te ako takirua i Te Kura.
Te mahi tahi me ngā umanga
Te mahi tahi mō ā mātou ākonga.
Ka mahi pātata a Te Kura me ngā tari kāwanatanga pēnei i...Te Tāhuhu o te Mātauranga, Te Tāhū o te Ture, NZQA me ētahi atu umanga o te wāhanga mātauranga. Ka mahi tahi hoki mātou me Mana Mokopuna | Children’s Commissioner. Ka tukuna mai e ētahi umanga ngā ākonga me ngā whānau ki a mātou mehemea kāore i te tino hāngai tō rātou kura ā-rohe. Ka mahi tahi ētahi umanga me mātou i ngā kaupapa motuhake hei tautoko i te whai wāhi mai me te angitu i roto i te mātauranga.
Mēnā e whakaaro ana koe ko Te Kura te wāhi tika mōu, tēnā, whakapā atu ki te tari ā-rohe o tō umanga. Ka āhei rātou ki te āwhina i a koe ki te kimi mēnā rānei ka tutuki i a koe ngā paearu whakaurunga, ā, ka tautoko hoki i a koe i te tukanga whakaurunga.
Te mahi tahi kia angitu ai koe
